फोंडा पोंटवेंचणूक, भाजपाचें मनांत नेमकें चल्ला कितें? रितेशाक डावलून हेराक उमेदवारी?

By Vishwanath Nene

पणजे महापालिकेच्या वेंचणूकेची कार्यावळ गोंय राज्य वेंचणूक आयोगान जाहीर केली. सीसीपी वांगडा फोंडा पोटवेंचणुकूय जाहीर जातली म्हूण लोकानी अंदाज बांदिल्लो. मात तशें जालें ना. फोंडा पोंट वेंचणूक भारतीय वेंचणूक आयोग जाहीर करतले. मात कायद्यान मार्चांत ती जावपाकूच जाय.दुसरे वटेन पोंटवेंचणूकेच्या फांटभूयेर  फोंडा राजकारण तेंगशेर पावला. रितेश रवी नायकाक भाजपाची तिकेट मेळटली काय विश्वनाथ उर्फ अपुर्व दळवीक मेळटली हाचेर आरत्यो परत्यो चर्चा चल्ल्यात. दुसरे वटेन काँग्रेसीच्या खेम्यांतूय हालचालींक नेट आयला. फाटले फावट मगोच्या तिकीटीचेर काय अवघ्या मतांनी पराभूत जाल्लो डॉ.केतन भाटीकार काँग्रेसीच्या तिकीटा खातीर नेट लायतना दिश्टी पडटा.भाटीकाराचे हे चालीन राजेश वेरेंकारूय चलबिचल जाला. रवीचो दुसरो पूत रॉय नायकूय फोंडा पोटवेंचणूके खातीर इत्सूक आसा. नियती रॉयाक रवीचो राजकी वारस थारायता काय ते पळोवचें पडटलें.

https://www.instagram.com/p/DU45VWWlSkD/?igsh=cmluY2NmejdxOTE4

रितेशाक राजीव गांधी कला मंदीराचे अध्यक्षपद हे न्हयकाराचें अप्रत्यक्ष शिनाल?
रवीचो व्हडलो पूत रितेश नायक फोंडा पोंटवेंचणूके खातीर रेसींत फुडें आशिल्लो. मगोचे अध्यक्ष दीपक ढवळीकार आनी मंत्री सुदिनानूय रितेशाक तेंको दिल्लो. मात अचकीत रितेशाची राजीव गांधी कला मंदीराचेर अध्यक्षपदाचेर नेमणूक जाली. रितेश तिकीटीचे रेसींत आसतना ताका अध्यक्षपद दिवन भाजप ताका फटोवपाक सोदता म्हूण फोंड्यां चर्चा चल्ल्या. कारण रितेशाक तिकेट दिली जाल्यार ताका हे पद सोडचे पडटले. ताका लागून भाजप हो द्राविडी प्राणायाम कित्याक करतले? हाचोच अर्थ भाजपाचे मनात वेगळो विचार चल्ला काय कितें हे चर्चांक थारो मेळटा. रितेशान हें पद घेवपाकूच जाय नाशिल्लें असोय एक सूर रवीचे बरें मागप्यां कडल्यान येता.

https://www.instagram.com/p/DU24YiACrBN/?igsh=MXh3aDdueXhpMTVtcQ==

भाजपातल्यानूच रितेशाक थेट आव्हान, विश्वनाथ दळवी फॉर्मान!
भाजपाचे उमेदवारीक रितेशा मुखार आव्हान निर्माण केलां ते भाजपाचोच दुसरो खडेगांठ फुडारी विश्वनाथ उर्फ अपुर्व दळवीन. दळवीचो फोंडा मतदारसंघातूच न्ही जाल्यार पुराय तालुक्यांत दबदबो तयार जाला. सरकारी कामां, नोकऱ्यो, बदल्यो, नेमणूको ह्यो सगल्यो दळवीच्या उतरा प्रमाण घडटना दिश्टी पडटात. हालीच आपले सुसज्ज कार्यालय उक्ते करुन दळवीन आपली सुसज्जता दाखयल्या. दळवीक भितरल्यान मुख्यमंत्री दोतोर प्रमोद सावंताचो तेंको आसा म्हूण सुत्रां सांगतात.

https://www.instagram.com/p/DU4_QruFUJS/?igsh=NTNxOXh2dDRta2k5

भाटीकार पाटकार इश्टागत वेरेंकाराक बादपाची चिन्नां
फोंडेचो काँग्रेसीचो फुडारी राजेश वेरेंकारान सगळ्यांत पयलीं फोंडेची पोटवेंचणूक लडोवपाची घोशणा केल्ली. मात सगळ्यांत पयलीं घोशणा करुनय वेरेंकाराक काँग्रेस फुडार्‍यांनी तशी ताकद दिली ना. हे कारणाक लागून परतून एक फावट काँग्रेस हे पोटवेंचणूके विशीं कितली गंभीर आसा असो प्रस्न सगल्यांक पडला. आजून काँग्रेसनी आपलो उमेदवारुय निश्चीत करुन ते दिकेन काम सुरू करुंक नाशिल्ल्यान पाटकारान काँग्रेसीची परंपरा कायम दवरल्या अशें राजकी विश्लेशक उलयतात. राजेश वेरेंकाराक डावलून जर डॉ. केतन भाटीकाराक काँग्रेसीची उमेदवारी मेळ्ळी जाल्यार वेरेंकार कितें भुमीका घेता ताचेर फोंडें पोंटवेंचणूकेचो निकाल थारतलो हाचेर कांयच दुबाव ना. दुसरे वाटेन सरकारातलोच एक मंत्री केतनाक काँग्रेसीचे तिकेट मेळोवन दिवपा खातीर फिल्डींग लायता म्हूण सुत्रां सांगतात.

https://www.instagram.com/p/DU42RXhisG6/?igsh=Ymw0b3ZibTk5d2Nz

रॉय नायकूय इत्सूक, नियती थारायतली काय रॉयाक रवीचो वारस?
रवी नायक हांचो व्हडलो पूत रितेश नायक भाजपाचे उमेदवारी खातीर दावेदार आसा. मात रवीचो दुसरो पूत रॉय नायकानूय इत्सा उक्तायल्या. मात रितेशाक उमेदवारी मेळत जाल्यार रॉय पोटवेंचणूकेंत आसचो ना. रितेश आनी रॉय हांची तुलना करीत जाल्यार रॉयाक वाळपय पोटवेंचणूक लडोवपाचो अणभव आसा. एक मोठो मातब्बर राजकी फुडारी विश्वजीत राणे आड रॉयान वाळपय पोटवेंचणूक लडयल्या आनी सुमार साडे स हजार मतांय काडल्यात. रॉय नायकाचो स्वभाव, उलोवपाची पद्धत हे सगले बापूय रवी नायका भाशेन आसा अशें लोक उलयतात. जरी सत्तेत ना तरी रॉया फाटल्यान फकत फोंडेचेच न्ही जाल्यार मयें, मडकय, उसगांव हे मतदारसंघातले तरणाट्यांची फौज आसा. सद्याक रितेशाक लागून रॉय मात्सो बॅकफुटार रावला. दुसरी गजाल म्हळ्यार फोंडेचे रवी समर्थक पंच, सरपंच, नगरसेवक हांचो रॉया कडेन बरे पैकी संपर्क आसा. रॉयाचे बाबतींत हे सगले आसतना ताका उमेदवारी मेळटली आनी नियती ताका रवीचो खरो राजकी वारस थारायतली काय हे पळोवचें पडटलें.